एसआयआर : हरकतींसाठी १२ ऑक्टोबरपर्यंत मुदतवाढ, बीएलओ घरी येऊन कागदपत्रे स्वीकारणार
मतदार याद्यांच्या विशेष सखोल पुनरीक्षण (एसआयआर) कार्यक्रमात दावे व हरकतींसाठी १२ ऑक्टोबरपर्यंत मुदतवाढ मिळाली असून नोटीस आलेल्या मतदारांची कागदपत्रे बीएलओ घरी येऊन स्वीकारणार आहेत.
पुणे : भारत निवडणूक आयोगाच्या विशेष सखोल पुनरीक्षण (एसआयआर) कार्यक्रमांतर्गत दावे व हरकती दाखल करण्यासाठी १२ ऑक्टोबर २०२६ पर्यंत मुदतवाढ देण्यात आली आहे. 'नो मॅपिंग' किंवा तार्किक विसंगतीमुळे नोटीस आलेल्या मतदारांना तहसील कार्यालयात जाण्याची गरज नाही; मतदान केंद्रस्तरीय अधिकारी (बीएलओ) घरी भेट देऊन कागदपत्रे स्वीकारतील. व्हॉट्सअॅप किंवा ऑनलाइनही कागदपत्रे स्वीकारली जातील.
३, ४, १० आणि ११ ऑक्टोबर रोजी जिल्ह्यातील सर्व मतदान केंद्रांवर विशेष शिबिरे होणार असून नवीन नोंदणीसाठी नमुना ६ आणि दुरुस्तीसाठी नमुना ८ भरता येईल. महाविद्यालयांमध्ये ५ ते ९ ऑक्टोबर दरम्यान विद्यार्थ्यांची ऑनलाइन मतदार नोंदणी होणार आहे.
'वोटर हेल्पलाइन' अॅपवरही नोंदणी करता येईल; अधिक माहितीसाठी १९५० या टोल-फ्री क्रमांकावर संपर्क साधावा. नोटीस आलेल्या मतदारांनी घाबरून गर्दी करू नये आणि अफवांवर विश्वास ठेवू नये, असे आवाहन जिल्हाधिकारी जितेंद्र डुडी यांनी केले.