दुष्काळग्रस्त विद्यार्थ्यांसाठी शून्य परीक्षा शुल्क
उच्च व तंत्र शिक्षण मंत्री चंद्रकांत पाटील यांनी राज्यातील दुष्काळग्रस्त तालुक्यांतील विद्यार्थ्यांना परीक्षा शुल्कात १०० टक्के सूट जाहीर केली असून सावित्रीबाई फुले पुणे विद्यापीठात ६५,२०० विद्यार्थ्यांनी लाभ घेतला.
पुणे : राज्यातील दुष्काळग्रस्त तालुक्यांतील विद्यार्थ्यांना परीक्षा शुल्कातून पूर्ण सूट देण्याचा निर्णय उच्च व तंत्र शिक्षण विभागाने घेतला आहे. या निर्णयांतर्गत सावित्रीबाई फुले पुणे विद्यापीठातील तब्बल ६५,२०० विद्यार्थ्यांनी शून्य शुल्क सुविधेचा लाभ घेतला आहे.
राज्यात आतापर्यंत २,४०,३६५ विद्यार्थ्यांचे परीक्षा शुल्क माफ करण्यात आले आहे. उच्च व तंत्र शिक्षण मंत्री चंद्रकांत पाटील यांनी दुष्काळात एकाही विद्यार्थ्याचे शिक्षण थांबू नये हीच शासनाची भूमिका असल्याचे सांगितले.