व्हर्लपूलच्या रेफ्रिजरेटरमध्ये कृत्रिम बुद्धिमत्तेवर आधारित सुविधा
व्हर्लपूल ऑफ इंडियाने 'सिक्स्थ सेन्स' कृत्रिम बुद्धिमत्तेवर आधारित नवीन रेफ्रिजरेटर सिरीज बाजारात आणली आहे.
नवी दिल्ली : व्हर्लपूल ऑफ इंडियाने आपल्या लक्झरियम चार-डोअर रेफ्रिजरेटर मालिकेत सिक्स्थ सेन्स कृत्रिम बुद्धिमत्तेवर आधारित ताजेपणा ओळखणारे तंत्रज्ञान सादर केले आहे. फळे आणि भाज्या अतिपक्व होण्याची सुरुवातीची चिन्हे ओळखून, त्या खराब होण्याआधी ग्राहकांना सतर्क करणारी ही भारतातील पहिली प्रणाली असल्याचे कंपनीने प्रसिद्धीपत्रकात म्हटले आहे.
भारतीय कुटुंबे अनेकदा आठवडी बाजारातून मोठ्या प्रमाणात फळे आणि भाज्या खरेदी करून रेफ्रिजरेटरमध्ये ठेवतात. मात्र दैनिक कामांच्या व्यस्ततेमुळे साठवलेल्या पदार्थांकडे लक्ष न गेल्यास ते पिकू लागतात. त्यामुळे अन्नाची नासाडी होते किंवा ताजेपणा कमी होतो. या पार्श्वभूमीवर, रेफ्रिजरेटरमध्ये साठवलेल्या फळे-भाज्यांमधील इथिलिन वायू वेगवेगळ्या प्रमाणात बाहेर पडतो, ही बाब लक्षात घेऊन कंपनीने वैज्ञानिकांच्या सहकार्याने अन्नपदार्थांचा अभ्यास केला आहे.
या तंत्रज्ञानामध्ये कंपनीच्या आयफ्रेश सेन्सर यंत्रणेचा वापर करण्यात आला आहे. फळे आणि भाज्या ठेवण्याच्या खणात बसवलेला संवेदी घटक त्यांच्यातून बाहेर पडणारा इथिलिन वायू ओळखतो. सिक्स्थ सेन्स कृत्रिम बुद्धिमत्तेच्या साहाय्याने प्रणाली दर दहा सेकंदानी खणातील फळे आणि भाज्यांचे निरीक्षण करते आणि अतिपक्वतेशी संबंधित इथिलिन वायूचे प्रमाण वाढल्यास ग्राहकांना सतर्कतेचा संदेश देते.