पिंपरी चिंचवड महानगरपालिकेच्या अधिकारी, कर्मचाऱ्यांनी कोणत्या ही भेटवस्तू स्वीकारू नयेत, आयुक्त डॉ. विजय सूर्यवंशी यांच्या स्वाक्षरीने परिपत्रक जारी
पिंपरी-चिंचवड महापालिकेच्या कोणत्याही अधिकारी किंवा कर्मचाऱ्याने नागरिक, कंत्राटदार किंवा संस्थांकडून दिवाळीच्या भेटवस्तू स्वीकारू नयेत, असे कडक परिपत्रक आयुक्त डॉ. विजय सूर्यवंशी यांनी जारी केले.
पिंपरी : पिंपरी चिंचवड महापालिकेच्या प्रशासनात पारदर्शकता राहावी यासाठी आयुक्त डॉ. विजय सूर्यवंशी यांनी महत्त्वाचे परिपत्रक काढले आहे. त्यानुसार महापालिकेतील अधिकारी व कर्मचाऱ्यांनी नागरिक, ठेकेदार किंवा कोणत्याही संस्थेकडून भेटवस्तू किंवा देणगी स्वीकारू नये.
नियमांचे उल्लंघन करून भेटवस्तू स्वीकारल्याचे आढळल्यास संबंधित अधिकारी व कर्मचाऱ्यांवर तात्काळ शिस्तभंगाची कारवाई केली जाईल. तसेच सुरक्षा विभागानेही अशा भेटवस्तू घेऊन कार्यालयात येणाऱ्यांना मज्जाव करण्याचे निर्देश देण्यात आले आहेत.