लाडक्या ठेकेदाराला रस्त्याचे काम न दिल्याने थेट आयुक्तांनाच ॲट्रॉसिटीची धमकी
आपल्या ठेकेदाराला रस्त्याचे ९० कोटी रुपयांचे काम न दिल्यामुळे शहरातील सत्ताधारी आमदाराने महापालिका आयुक्तांनाच ॲट्रॉसिटीचा गुन्हा दाखल करण्याची धमकी दिल्याचा प्रकार पुढे आला आहे.
पुणे : आपल्या ठेकेदाराला रस्त्याचे ९० कोटी रुपयांचे काम न दिल्यामुळे शहरातील सत्ताधारी आमदाराने चक्क महापालिका आयुक्तांनाच 'ॲट्रॉसिटी'चा गुन्हा दाखल करण्याची धमकी दिल्याचा धक्कादायक प्रकार पुढे आला आहे. दुसरीकडे, आयुक्तांनी या आमदारांच्या दबावाला न जुमानता नियमानुसार पात्र ठेकेदाराला काम देण्याचा निर्णय घेतल्याने महापालिकेचे सुमारे नऊ कोटी रुपये वाचणार आहेत.
महापालिकेने प्रादेशिक परिवहन कार्यालय (आरटीओ) ते बंडगार्डन पूल या वर्दळीच्या रस्त्याला पर्यायी मार्ग म्हणून मुळा-मुठा नदीच्या कडेने वेलस्ली रस्ता प्रस्तावित केला आहे. हा रस्ता दोन किमी लांब आणि १७ मीटर रुंद असेल.